بیوی اور اولاد کا خرچہ خاوند کے ذمے ہے ارشاد باری تعالیٰ ہے :
” کشادگی والے کو اپنی کشادگی کے مطابق خرچ کرنا چاہئیے اور جس پر رزق تنگ کیا گیا ہو اسے چاہئیے کہ جو کچھ اللہ تعالیٰ نے اسے دے رکھا ہے اس میں سے دے ، اللہ تعالیٰ کسی شخص کو اس کی طاقت سے زیادہ تکلیف نہیں دیتے ۔ “ ( الطلاق : 7 )

نیز حضرت جابر رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا کہ تم پر معروف طریقہ کے مطابق ان عورتوں کو کھلانا پلانا اور لباس مہیا کرنا لازم ہے ۔ ( صحیح مسلم ، الحج : 1218 )

بہرحال شریعت نے خاوند پر خرچہ کی کوئی مقدار مقرر نہیں کی ہے ، جتنی ضرورت ہو اور جتنا ان کو کفایت کر جائے اتنا خرچہ دینا واجب ہے لیکن اگر کوئی خاوند اس خرچہ سے پہلو تہی کرتا ہے یا دیتا تو ہے لیکن اس سے گھر کا نظام نہیں چلتا تو اتنا خرچہ کسی طریقہ سے بھی لیا جا سکتا ہے جو اہل خانہ کیلئے کافی ہو جیسا کہ حضرت ہندہ بنت عتبہ رضی اللہ عنہا جو حضرت ابو سفیان رضی اللہ عنہ کی بیوی ہیں ، رسول اللہ صلی اللہ علیہ وسلم کی خدمت میں حاضر ہو کر عرض کیا یا رسول اللہ ! ابوسفیان ایک کنجوس آدمی ہے ، مجھے وہ اتنا خرچہ نہیں دیتا جو میرے لئے اور میرے بچوں کیلئے کافی ہو مگر میں خفیہ طریقہ سے کچھ لے لیتی ہوں کیا ایسا کرنے سے مجھے گناہ تو نہیں ہو گا ؟

رسول اللہ صلی اللہ علیہ وسلم نے فرمایا :
” معروف طریقہ سے اتنا مال لے لیا کرو جو تمہیں اور تمہارے بچوں کو کافی ہو جائے ۔ “ ( صحیح بخاری ، البیوع : 2211 )

اس حدیث سے مندرجہ ذیل مسائل کا پتہ چلتا ہے :

1     بیوی کے خرچہ کی مقدار متعین نہیں ہے اور نہ اولاد کیلئے کچھ مقرر ہے ، دونوں اخراجات معروف طریقہ سے ادا کئے جائیں ۔

2      اگر شوہر اور والد اپنے اوپر واجب خرچہ ادا نہ کریں تو بیوی اور اولاد کو اتنا خرچہ لینے کی اجازت ہے جو انہیں کافی ہو ۔

3      واجب حقوق میں جس کی مقدار اللہ اور اس کے رسول نے مقرر نہیں کی ، اس میں عرف کو ملحوظ رکھا جائے گا ۔

صورت مسؤلہ میں سائلہ کو خاوند کے مال سے معروف طریقہ کے مطابق اتنا لینے کی اجازت ہے جس سے گھر کا نظام چل سکے ، لیکن ضروریات کی آڑ میں فضولیات کا دروازہ نہ کھولا جائے اور فیشن پرستی اور فضول خرچی کی گنجائش اس حدیث سے پیدا نہیں ہوتی ۔ اگرچہ خرچہ کی مقدار مقرر نہیں ہے کیونکہ مقدار مقرر کرنا ظلم کے مترادف ہے بہرحال جتنی ضرورت ہو اور جس قدر کفایت کر جائے خاوند کے مال سے اجازت کے بغیر لینے کی شرعاً گنجائش ہے ۔ ( واللہ اعلم )